• Garbitu maiz eskuak, eta beti elikagaiak manipulatu edo kontsumitu aurretik.
  • Garrantzitsua da kontsumitu beharreko elikagaiak ERABAT kuzinatuak egotea eta bero mantentzea.
  • Ez kontsumitu itsaski gordinik, kolore gorrixka duen edo kolore gorrixkako ura duen hegazti-haragirik edo erabat kuzinatu gabeko hanburgesarik, arazoak sorraraz baititzakete. Ezinbestekoa da janari guztia erabat kuzinatua egotea, barrutik zein kanpotik. Elikagai osoak, hau da, zati guzti-guztiek jaso behar dute, gutxienez, 70ºC-ko tenperatura.
  • Elikagaiak saltzaile ibiltariei erosi badizkiezu, ziurtatu ez daudela kontaktuan elikagai kuzinatuak eta elikagai gordinak, kutsadura gerta baitaiteke.
  • Arrautza gordina edo gutxi kuzinatua duten janariak (etxeko maionesa, saltsa eta postre batzuk) arriskutsuak izan litezke.
  • Izozkiak, ura, izotza eta esne gordina erraz kutsa litezke. Ez kontsumitu zalantzarik baduzu.
  • Zuritu fruta eta barazki guztiak gordinik kontsumitu behar badituzu. Ez kontsumitu azala kaltetuta edo lizunduta duen frutarik. Hostodun barazkiek (entsaladak) kanporatzen zailak diren mikroorganismo arriskutsuak izan ditzakete. Ez kontsumitu halako barazkirik, higiene baldintzei buruzko zalantzarik baduzu.
  • Edan, ahal baduzu, botilako ura. Nolanahi ere, ziurtatu ez dutela botila lehenago ireki, edo berriz bete. Irakin kontsumitu aurretik, uraren osasungarritasunari buruzko zalantzarik baduzu.

Aipatutako aholku guztiak bete ezik, posible litzateke beherakoa izatea (edo goragalea, gorakoak, sukarra ala sukarrik gabe). Horrelako egoeretan garrantzitsua da ur asko edatea hasiera-hasieratik. Saiatu deshidratazioa ekiditen, batik bat lurralde beroetan. Horretarako, gomendagarria da kaferik ez kontsumitzea, ez eta gehiegi gozatutako edaririk, zenbait te sendagarri eta alkoholik ere. Izan ere, horiek kontsumituta, organismoak likido kopuru handiagoa kanporatzen du.

NAZIOARTEKO BIDAIETARAKO AHOLKUAK INFAC

Sortze data: 2010-09-06

Eguneratze data: 2018-07-18